Moliya vazirligining “Ochiq budjet” axborot portali orqali aholi tashabbusi asosida shakllangan tadbirlarni ro‘yobga chiqarish uchun ovoz berish jarayoni yakunlandi. Jarayon uchun 4 milliard 863 million 825 ming so‘m mablag‘ yo‘naltirildi.
Birinchi boshqichda fuqarolar tomonidan 165 ta taklif ilgari surilgan bo‘lib, belgilangan mezonlarga muvofiq bo‘lgan 144 tasi umumxalq ovoziga qo‘yildi. Joriy yilning 24-avgustdan 17-sentabrga qadar o‘tkazilgan ovoz berish yakunida 4 ta taklif g‘olib deb topildi. Jumladan:
– Naymantepa mahallasining “Abdurahmon ota” to‘yxonasidan 34-maktabgacha bo‘lgan 1,7 kilometr ichki yo‘lini asfalt qilish taklifi 5259 ta ovoz bilan 1-o‘rinni;
– Juriyat mahallasidagi qo‘lbola o‘rnatilgan, yaroqsiz 400 ta simyog‘ochlarni temir-beton konstruksiyali ustunlarga almashtirish hamda 8 kilometr yopiq izolyatsion tok o‘tkazgichli kabel, 500 ta zajem, 80 ta travers, 480 ta stakan, 320 dona xomut o‘rnatish taklifi 4177 ta ovoz bilan 2-o‘rinni;
– Tuman ko‘p tarmoqli markaziy poliklinikasining bolalar bo‘limi uchun qo‘shimcha bino qurish taklifi 3864 ta ovoz bilan 3-o‘rinni;
– Eski Jomboy mahallasidagi oilaviy shifokor punktiga qo‘shimcha bino qurish taklifi 3452 ta ovoz bilan 4-o‘rinni egalladi.
Loyihalar xalq deputatlari tuman kengashining qarori qabul qilingandan so‘ng ro‘yobga chiqarila boshlaydi.
Jarayonda ishtirok etgan barcha fuqarolar hamda OAV vakillariga minnatdorchilik bildiramiz.
Muhammadjon SULAYMONOV,
Moliya bo‘limi bosh iqtisodchisi.