Xalq banki xalq orasida xayriyaga kirishdi

Хalq banki tuman filiali jamoasi muborak Qurbon hayiti arafasida xayrli tashabbusga qo'l urdi. Nogahon, Sarqipchoq, Qo'lbosti, Qo'ng'irot, Olmazor kabi markazdan olis mahallalarda istiqomat qilayotgan, ehtiyojmand oilalarga oziq-ovqat mahsulotlari tarqatildi. 

– Tashabbusni jamoamiz a'zolari qo'llab-quvvatlashdi, – deydi filial rahbari Nigina Mahmudova. – Asosiy e'tiborni chekka hududlarda, og'ir ijtimoiy vaziyatda yashab kelayotgan, nogironligi bo'lgan fuqarolarga qaratdik. Xalqimizga xos mehr-saxovat qadriyatlari bugungi muborak kunlarda yanada mustahkamlanishi kerak, deb o'ylayman.

Tadbir davomida bank mutasaddilari har bir ehtiyojmand xonadonga kirib, ularning ko'ngliga quloq tutishdi. Muammolari, kamchiliklarini, taklif, fikr-mulohazalarini eshitishdi. Hayit ayyomi bilan muborakbod etib, 12 turdagi mahsulotlar berildi.