Prezidentimiz yashil maydonlarni kengaytirishga bejiz e’tibor qaratmadi. Bundan ko‘zlangan maqsad qarovsiz qolayotgan hududlarni obod qilish orqali tabiiy musaffolikni saqlash, yurtimiz manzarasini yanada go‘zal qilishdan iboratdir.
Ushbu jihat inobatga olinib tumanimizda o‘tkazilayotgan ko‘chat ekish tadbirlarida asosan, tashlandiq ahvolga kelib qolgan maydonlar tanlanmoqda. Jumladan, tumanimiz markaziga kirib kelishda – “Uz Truck and Bus Motors” avtomobil zavodi yaqinidagi nishablik ayni paytda obodonlashtirilmoqda.
– Umumiy maydon 1,2 gektarni tashkil etadi, – deydi tuman hokimi o‘rinbosari H.Hamroyev. – Yapon safurasi, archa, katalpa, qayrag‘och kabi 3 ming tupdan ortiq manzarali daraxt ko‘chatlarini o‘tqazish rejalashtirilmoqda. Ammo yer xususiyatini e’tiborga olib, daraxtlar ekiladigan maydonga ma’lum miqdorda unumdor tuproq to‘shalyapti. Bu ham kelgusida samaradorlikni oshiradi.
Ayni paytda hududda obodonchilik ishlari davom etmoqda.