Korrupsiya jamiyat uchun halokat

Tuman hokimligida huquqni muhofaza qiluvchi organlar ishtirokida seminar o‘tkazildi. Tadbirda “Korrupsiya va bu turdagi jinoyatlarning jamiyat taraqqiyotiga halokatli ta’siri” mavzusida so‘z yuritildi.

Viloyat hokimligi, ichki ishlar boshqarmasi, prokuratura mutasaddilari so‘zga chiqib, davlat xizmatchilari tomonidan pora olish yoki unga vositachilik qilish og‘ir jinoyat ekani, bunday qilmish uchun milliy qonunchiligimizda qat’iy jazo choralari belgilanganini ta’kidlashdi. 

Ma’lumot o‘rnida aytish joizki, joriy yilning o‘tgan davrida tumanimizda 260 dan ortiq jinoyat sodir etilgan bo‘lib, shundan 4 tasi korrupsiya bilan bog‘liq harakatlar hissasiga to‘g‘ri keladi. Bu o‘z navbatida, targ‘ibot ishlari ko‘lamini yanada kengaytirish zarurligini anglatmoqda. Zero, muqaddas dinimizda ham bu illat qattiq qoralangan. Mavzu yuzasidan fikr bildirgan “Islomobod” jome masjidi imom-xatibi X.Sattorov Qur’oni karim va Hadislardan misollar keltirdi.