Бугун туман марказида транспорт қатнови сезиларли даражада кўпайди. Сарой, Арчазор, Шукур Бурхонов номидаги кўчаларда янада тирбандлик, тартибсизлик юзага келди. Фақат шугина эмас. Банк, шифохона, кўча-кўйда одамларнинг тўп-тўп йиғилганини кўриш мумкин.

Жомбой “сариқ” ҳудуд ҳисобланса ҳам, бу карантин чекловлари бутунлай олиб ташланганини англатмайди. Афсуски, бугун кузатилган тартибсизлик кишини хавотирга солади:

Сарой кўчасидаги ҳолат

“Агробанк” туман филиалининг шахобчаси ёнида одам ҳар қачонгидан кўп тўпланган. Аксига олиб, навбатда турганлар банк эшигини соатлаб банд этишди.

“Агробанк”

Тўғри, “Агробанк”нинг асосий биноси ҳозирда ёпиб қўйилган. Таъмирлаш ишлари кетяпти. Лекин бу мижозларга ортиқча ноқулайлик туғдирмас экан. Банк бошқарувчиси Озод Ўсаровнинг маълум қилишича, банкоматдан ташқари, барча хизматлар Арчазор кўчасидаги шохобча орқали кўрсатиляпти. Хўш, унда муаммо нимада?

“Агробанк”нинг таъмирланаётган асосий биноси

“Бугун электрон тизимда бироз носозлик кузатилди. Оқибатда мизожлар 3-4 соатлаб кутиб қолишди. Лекин ҳозир тизим тўлиқ ишлаяпти. Аҳолига хизмат кўрсатувчи ходимлар сонини икки баробарга оширдик. Айни пайтда эшик олдида кутиб қолувчилар кескин камайган. Негадир душанба куни мурожаатчилар сони ҳам ортиб кетди. Карантин қоидасини бузманг, деб ҳар куни тушунтириш берамиз. Аввало, фуқароларнинг ўзи буни тўғри тушуниши лозим”, - дейди О.Ўсаров.

ТТБ кўчасидаги тирбандлик

Туман тиббиёт бирлашмаси атрофидаги вазият. Йўлнинг икки чети ва ўртасига автомбиллар қўйиб кетилган. Бир қарашда охири кўринмайдигандек тасаввур уйғотади. Эшик олдида эса одамлар гавжум.

ТТБ

“Шифохонага ҳамма беморлар қабул қилинмаяпти. Фақат туғруқ, юқумли касалликлар ва болалар бўлими ишламоқда. Бошқа касаллик турлари бўйича аҳоли ҳудудлардаги ҚОП ва ҚВП га мурожаат қилиши керак. Ўндан ортиқ малакали тиббиёт ходимларини ҳудудларга юбордик. Карантин вақтида улар ўша жойда туриб, беморларни қабул қилишади. Эшик олдида турганларнинг аксарияти эса беморларнинг ортидан келган. Ёки ўз ҳудудига бориш кераклигини билишмайди”, - дейди ТТБ Эрмуҳаммад Боймуродов.

ТТБ кўчасидагитартибсизлик

Кўчадаги бу тартибсизлик шифохонанинг тез ёрдам ва бошқа хизмат автомобиллари ҳаракатига ҳам тўсқинлик қилаётгани айтилди.

Шундай пайтда транспорт қатновини тартибга солиб, одамларни ҳушёрликка чақириш мумкин-ку. Йўл патрул хизмати ходимлари нега шуни ҳисобга олмаяпти? Туман СЭО маркази ходимлари-чи? Мухбирларимиз ўрганган бирор ҳудудда уларни учратмади.

ТТБ

Бундай нохуш манзарани "Халқ банки" атрофида ҳам кузатиш мумкин.

"Халқ банки"

Шу ўринда бугун айтилган кўнгилсиз ҳолатни эътиборга олиш ўринлидир. Яъни, маълум муддат касаллик қайд этилмаган ҳудудлар - Андижон ва Бухоро вилоятларида янгидан касаллик ҳолати кузатилгани маълум қилинди.

Жомбой тумани эса бир эмас, тўртта “қизил” ҳудуд билан чегарадош (Самарқанд, Тойлоқ, Оқдарё, Пайариқ). Демак, ҳозир лоқайдликнинг пайти эмас.

Ижтимоий масофани сақлаш, ниқоб тақиш, кекса ёшдаги фуқароларнинг кўчага чиқиши таъқиқланган. Хулоса қилиб айтганда, карантин қоидаларига биринчи галда аҳоли амал қилиши лозим. "Уйда қолинг", деган чақириқ, барча учун айтилаётганини унутмайлик!

"Жомбой тонги" газетаси.