Тўққизбойда “Зинга-зинга” етиштириляпти

Шу кунларда қулупнай бозор растларини тўлдириб, харидоргир маҳсулотлар рўйхатидан тушмаяпти. Ички ва ташқи талабни ҳисобга олган “Оҳалик олтин боғи” масъулияти чекланган жамияти ер тутни Жомбой тупроғида етиштиришга киришди. 

Ўн гектар майдонга экилган ўсимлик кутилганидан ортиқ ҳосил бераётган экан. Деҳқонобод маҳалласида жамиятнинг кўчатчилик лабораторияси жойлашган. Бу ерда мева-сабзавотларнинг ҳосилдор навлари кўпайтирилади. Лаборатория ходимлари ўтган йили қулупнайнинг эртапишар, ҳосилдор “Зинга-зинга” нави устида изланиш бошлаганди. Украинадан келтирилган янги нав жорий йил тажриба тариқасида Тўққизбой маҳалласи ҳудудига экилди.

– Асосий мақсадимиз кўчатини кўпайтириш, – дейди жамият иш бошқарувчиси Бахтиёр Ҳусанов. – Ўн гектарда парвариш қилинаётган ўсимлик ёз фаслида туплаш фазасига киради. Танасидаги бўғинлар август ойида ажратиб олинади. Тайёр бўлган экинни шартнома асосида фермер хўжаликларига етказиб берамиз.

Аҳамиятлиси, кўчатлар биринчи йилнинг ўзида тўлиқ ҳосилга кирган. Бу хўжалик даромадини икки ҳисса оширгани шубҳасиз. Бир гектаридан 15 тоннагача маҳсулот олинаётгани буни тасдиқлайди. Теримда нафақат маҳалла аҳолиси, балки қўшни Пайариқ туманидан келган 300 нафарга яқин мавсумий ишчилар қатнашмоқда. Баракали неъмат ортидан юзлаб оилалар ҳам ишли бўлгани қувонарлидир.

Бахтиёр Ҳусановнинг айтишича, полиз экинлари замонавий усулда томчилатиб суғориш йўли билан парвариш қилиняпти. Далага ўрнатилган иккита сув иншоотининг бири қуёш батареяси асосида ишлайди. Гектарига 40 минг туп кўчат экилса, суғориш қийин кечмайди. Экинлар бир маромда сув ичиб, яхши ҳосил беради. 

Ҳар тупдан икки килограмгача маҳсулот олиш мумкин. “Зинга-зинга” нави май-июнь ойигача гуллаб, ҳосилга киради. Яхши парвариш қилинса, кузда ҳам қулупнай истеъмол қиласиз, – дейди Б.Ҳусанов.

Дарвоқе, мева-сабзавот турларини кўпайтириш ва етиштириш учун “Оҳалик олтин боғи” МЧЖга туманимиз ҳудудидан 100 гектар майдон ажратилган. Жамиятга қарашли шафтоли, олма, гилос боғлари уч-тўрт йилдан буён ҳосил бермоқда. Етиштирилган маҳсулот хорижга ҳам экспорт қилиняпти.

Бу йилги қулупнайнинг асосий қисми Сурхондарё вилоятига етказиб берилар экан. Денов тумани ҳокимлиги ва мутасаддилар жамиятга тез-тез келиб, қулупнай етиштириш бўйича тажриба алмашиб туришади. Тўққизбойда етиштирилаётган сарҳил мева соҳа мутахассисларида катта қизиқиш уйғотмоқда.

Шерзод ИСОҚУЛОВ,
Соҳиб САЙФУЛЛАЕВ.