Гандбол бўйича республика очиқ биринчилиги ўтказилди. Мусобақада ўсмир ёшдаги йигит-қизлар чемпионлик рутбаси учун кураш олиб боришди.
Жамоавий ўйинларда вилоятимиз шарафини ҳимоя қилган ёшлар 1-ўринни эгаллашди. Эътиборлиси, нуфузли чемпионатда илк бор жомбойлик ўқувчилар ҳам қатнашди.
– Ўтган асрнинг саксонинчи йилларида туманимиз гандбол спорт туридан тенгсиз бўлган, – дейди меҳнат фахрийси Г.Мелиев. – Кейинчалик, бу йўналишда спортчилар етишиб чиқиши тўхтаб қолди. Жомбойлик йигит-қизларнинг яна мусобақаларда иштирок этаётгани, вилоят жамоаси таркибида ғалабага эришгани қувонарлидир.
Туризм ва спорт бўлимидан хабар қилишларича, 40-ихтисослаштирилган давлат умумтаълим мактаби ўқувчилари Фаёз Раимов ҳамда Элдор Юсупов, шунингдек, 54-мактаб ўқувчиси Дилсевар Келдиёрова вилоят терма жамоасининг муҳим ўйинчиларидан саналади. Уларнинг муваффақияти замирида туманимиздаги болалар-ўсмирлар спорт мактаби мураббийси Рисолат Облобердиеванинг ҳам хизматлари бор.