Barkamol avlodni tarbiya qilish uchun avvalo, ular qalbiga Vatanga muhabbat ruhini singdirish talab etiladi. Joylarda o‘tkazilayotgan harbiy-vatanparvarlik tadbirlaridan ko‘zlangan maqsad ham shu.
Tumanimizning bir qator maktablarida chaqiriqqa qadar boshlang‘ich tayyorgarlik o‘quv mashg‘ulotlari sifatli tashkil etilgani bu boradagi ishlar samarasidan darak beradi. Yoshlarimiz sport, ma’naviy-ruhiy tayyorgarlik, nazariy bilimlar borasida yuqori natijalarga erishayotgani esa quvonarlidir. Shunday o‘quvchilarimizdan 80 nafari Mudofaa vazirligining “Vatan tayanchi” ko‘krak-nishoni bilan mukofotlandi.
Taqdirlash marosimida mudofaa ishlari bo‘limi rahbari, podpolkovnik Bahriddin Jo‘rayev ishtirok etib, yurtimizda yuksak salohiyatli avlod tarbiyasiga qaratilayotgan e’tibor haqida so‘z yuritdi. Kelajak avlod orasidan Shiroq, Jaloliddin Manguberdi, Amir Temur, Zahiriddin Muhammad Bobur kabi buyuk sarkardalar, Vatan himoyachilari yetishib chiqishiga ishonch bildirdi.
Jamoatchilik vakillari ishtirokida ko‘krak-nishoni o‘z egalariga topshirildi.