Туманимизда йирик сиёсий жараён – Қонунчилик палатаси ва ҳудудий кенгашлар депутатлигига сайлов учун қизғин ҳозирлик кўрилмоқда.
Бугун Енгил саноат касб-ҳунар коллежида жойлашган 289-сайлов участкасида намунавий амалий тренинг ўтказилди. Репетицион шаклда ўтказилган тадбирда ҳудуд учун тайинланган тренер А.Тўғизбоев участка комиссияси раиси, ўринбосари ва аъзоларининг ваколатлари, сайловчилар, маҳаллий ва хорижий кузатувчилар ҳуқуқи, мажбуриятлари ҳақида тушунча берди.
Сайлов жараёнининг намунавий шакли амалий тарзда кўрсатиб берилди. 

“Замонавий мактаб”ларни ташкил этиш чора-тадбирлари тўғрисида” Президент қарори қабул қилинди. Ҳужжат умумтаълим мактаблари ҳолатини яхшилаш, муаммо ва камчиликларни бартараф этиш, қишлоқ ва шаҳар мактаблари ўртасидаги тафовутни қисқартириш, таълим сифати ва самарадорлигини оширишга қаратилган ислоҳотларни янада кенгайтиришни кўзда тутади.

Халқаро ногиронлар куни муносабати билан Афсона базмгоҳида байрам тадбири ўтказилди.
Туманимизда 2500 га яқин ногиронлиги бўлган шахслар истиқомат қилмоқда. Уларнинг ижтимоий турмаш даражасини яхшилаш, саломатлигини тиклаш ҳамиша диққат эътиборимизда. Хусусан, жорий йил ҳисобидан уларнинг 14 нафарига имтиёзли уй-жой учун бошланғич тўловлар ўтказиб берилди. Юзга яқин ногиронлик аравачаси, эшитиш мосламаси, ҳасса-таёқ каби реабилитацион воситалар ажратилди. Бу каби ишлар бундан кейин ҳам давом эттирилади.

Яқинда Марказий сайлов комиссияси томонидан депутатликка номзодларнинг сайловолди ташвиқотини олиб бориш тартиби тўғрисида низом тасдиқланди. Унда оммавий ахборот воситалари, босма, кўргазмали, аудиовизуал ва бошқа материаллар орқали сайловолди ташвиқотини ўтказиш, учрашувлар ташкил этиш тартиби белгиланган.
Қайд этиш жоизки, сайловолди ташвиқоти номзодларни рўйхатга олиш учун белгиланган охирги куннинг эртасидан бошланади. Овоз бериш бошланишидан бир кун олдин тўхтатилади. Бунда номзодлар тенг ҳуқуқларга эга бўлиб, уларнинг номидан ишончли вакиллар тайинланиши мумкин.

Туман маъмурий суди мутасаддилари жойларда сайлов тадбирининг қонуний ташкил этилиши, сайлов кодекси талаблари, нормалар бузилганда юзага келиши мумкин бўлган жавобгарлик масаласида суҳбат ташкил этмоқда.
Ана шундай тадбирлардан бири давлат санитария ва эпидемиология назорат марказида бўлиб ўтди.